تابعوني على مدونتي التانية

http://nailpolishes.sarahglam.com/

مزيل الجلد حول الظفر من كليرز

من المشاكل اللي واجهتها هي الجلد اللي حوالين الظفر اللي ما كنت عارفة كيف اتخلص منه زي المتخصصين في الصوالين اللي بروحها

و في وسط الحيرة دي رحت كليرز..اكيد كلكم تعرفوه…و بالصدفة لقيت عنده طلاء يشيل الجلد اللي حول الظفر..تماما اللي ابغاه، هو بعينو

اسمه

speedy nails cuticle remover

تحطيه علي الجلد اللي حول الظفر و تنتظري ٣ الي ٥ دقايق، على حسب كمية الجلد الي تبغي تتخلصي منه..بعدها بأداة خاصة بده الشي و تلاقيها في الصيدليات تشيلي شويه شويه الجلد، و هذا هو شكل الاداة

انا جبتها من صيديلة سعود اللي في سوق حراء

طبعا مو كله حيتشال علي حسب قد ايش حطيتي و كم المدة اللي سبيته ..يعني اكتر من ٥ دقايق ممكن يعمل مفعول احسن بس يستحسن انك ما تسيبيه كتير. الشي اللي حتلاحظيه اكتر شي انه الجلد سار ليّن و تقدري ترجعيه علي ورا شوية يا بالاداة او بظفرك عادي

منتج رائع و اقترحه للجميع

المده اللي تفصل بين كل استخدام و التاني…اسبوع الي اسبوعين

احلى حاجة فيه انه ما يحتاج اي خطوات غير انك تحطيه علي الجلد حول الظفر و تنتظري،  غير المنتجات التانية اللي تحتاج انك تحطي يدك في موية دافيه الاول  و بعدها خطوات كتير.. يبغالها موضوع لوحدها

احس هذا المنتج حيوفر شوية من مصاريفكم و وقتكم كمان و في نفس الوقت حتحافظوا علي نظافة و ترتيب اظافيركم

فروع كليرز…ماشا الله ما يحتاج ادلكم..منتشر في كل جدة

فرع سوق حراء – السيليمانية بلازا – التحلية سنتر

و غيرهم كتير

مناكير O.P.I – البني المجنون

أهلا بالجميع

اليوم حتكلم عن مناكير احبه جدا الا وهو

O.P.I

و اللي معروف بتسميته لالوانه بأسماء غريبة و بعضها مضحك و صراحة هذا احلى شي فيه بجانب الوانه الرائعة

اليوم اخترت لكم اللون البني

Suzi Says Da!واللي اسمه

سعته ١٥ مل

هذه صورتين بدرجة اضاءة مختلفة

لون رائع و مريح و انتي بتحطيه ما هو متعب، لونه تقيل لكن احسن انك تحطي طبقتين عشان يعطيكي لون قوي

انا صراحة ما كنت حاسة انه حيطلع حلو و كنت مركزة اكتر على درجات الاحمر و الفوشي…لكن اول ما حطيته عجبني و بفكر اجرب درجاته التانية

و ان شا الله اعطيكم رأيي فيها قريب

ان شا الله يكون عجبكم الموضوع و اللون كمان

ــــــــــــــــــــــــــــــ

منتجات O.P.I

بتتباع في محلات نزيه

فروعها اللي اعرفها

مركز دانية – شارع حراء

و عند دوار الفلك

Color Club vs GalaxjSantLukant

اليوم عندنا لونين قريبين جدا من بعض و من ماركة مختلفة

ColorClub, pink rush - GalaxjSantLukant, 07

اللونين في البداية تحسيهم نفس الدرجة بس بعد ما تحطيهم بتشوفي الفرق

كولوركلوب كان اسهل في وضعه و درجته قوية و واضحة يعني فوشي فوشي ما بيمزح

لازم طبقتين منه – نشف في وقت اقصر

GalaxjSantLukant بالنسبة لـ

وقت الوضع ماشي حاله بس افضل انك تعبي الفرشة مرة كويس باللون – درجته اخف من كولوركلوب و يحتاج تلاتة طبقات مش طبقتين لانه يبين الظفر

انا حطيت طبقتين واللي لاحظته انه نشف في وقت اطول من كولوركلوب

بالنسبة لي افضل كلوركلوب اكتر

طبعا هذه الماركات بتتواجد في محلات المكياج الاقل شهرة او في البازارات

بتكون اسعارها اقل من الاسماء المعروفة

GalaxjSantLukant!

من بعض اسماء المناكير اللي مر علي واللي اول مرة اسمع بيه هو

GalaxjSantLukant

اللون الاحمر و الاسود

no 14

no 57

ريحتهم غريبة شوية…تقيل لما تجي تحطيهم….بالنسبة للاحمر طبقة وحدة تكفي اما الاسود فا يبغالو طبقتين

اللون الفوشي..

no 07

ريحته عادية و يحتاج طبقتين

اعتذر عن لونه في الصورة الاولى مرة طلع باهت (تعبني!)…هو لونه الاساسي فوشي

مميزاته انه سعره زهيد بس سيئاته انه مش مرة سلس وقت الاستخدام و ممكن ما يكون صافي مرة + ريحة الاحمر و الاسود غريبة  بالنسبة للمجموعة اللي جربتها

ــــــــــ

الموضوع الجي

مقارنة بين اللون الفوشي لهذه المجموعة و نفس اللون من ماركة تانية

مناكير سيفورا- يتبع

طبعا زي مانتو شايفين اضفت الوان تانية من سيفورا بالاضافة للون اللي قيد وريتكم هو

نبدأ باللون الاول

الاحمر القاتم..اسمه

L11 Cerise

اللون ده طبقة وحدة منه ما تكفي لانه هو و باقي الوان سيفورا ما بتكون تقيلة مرة لدرجة طبقة وحدة تكفي منها..ما عدا لون واحد حأذكره في النهاية

الشي اللي مضايقني في الفرشة انها قصيرة…فا يحتاج تعبيها باللون مرتين عشان تحطي اللون علي كامل الظافر في الطبقة الاولي

اعتقد انها حتكون متعبة اكتر لصاحبات الاظافر الطويلة جدا…الله يعينكم

اللون التاني

L09 Passion

هذا اللون تعبني في التصوير لانه بيظهر لونه برتقالي و هو درجة من درجاته اللي بيشترك فيها مع اللون الزهري

لون حلو و غريب

اللون التالت

L02 Coco

اللون هنا ابيض ناصع البياض…كان طبقة وحدة تكفي بس زي ما سبق و قلت انه ما بيغطي الظفر كامل فا لازم طبقتين

الشي اللي ما عجبني انه مرررة ابيض كإني حاطه مزيل علي ظفري

اذا انتوا برضو ما عجبكم لونه في درجات تانيه للابيض او قريبة منه من سيفورا برضو..شوفوها في هذا اللنك

آخر لون في هذا الموضوع هو

M19 Disco

انا عجبني الاسم و اللون…رائع جدا و يلمع

هو من مجموعة مختلفة عن الالوان الي قبلها..من مجموعة اسمها

Metallic nail polish collection

هذه يكفي تحطي طبقة وحدة لانه لونها تقيل و ماهو شفاف…انا جربت و حطيت طبقتين و ماأثر في درجة اللون

فا طبقة وحدة تكفي طبعا بالاضافة الي طبقة شفافة قبل و بعد اللون

الي هنا نوقف كلام عن سيفورا و نشوف اسماء تانيه

ـــــــــــــــــــــــ

فروع سيفورا في جدة

رد سي مول

التحلية سنتر

L22 Curacoa مناكير سيفورا

لكل من هي مهتمه و مولعة بالوان المناكير…هذا اللون اكيد حيعجبكم

انا في حالة عشق لهذا اللون…مو هاين علي امسحو مرة…هههه

L22 Curacoa

طبعا اخد منني تصوير كزا مرة لين ما وصلت للون الصحيح ..لانه مع اختلاف الاضاءة بيختلف اللون كمان

بالاضافة الي انه اللون ده عجيب في شي اكتشفته فيه…. اوقات يبان اخضر و اوقات يبان ازرق و ده احلي شي فيه

الشي اللي ما عجبني في المناكير تبع سيفورا انه قارورته صغيرة جدا ٥ مل

مقارنة بمناكير ماك ١٠ مل – جيسيكا ١٢ مل – ستارجيزر ١٤ مل و اخيرا كولور كلوب و او . بي . آي ١٥ مل

طبعا هذه الاسماء كلها مستخدمتها…و ازا اضفت نوع جديد اكيد حقوللكم عليه

بالنسبة لفرشتها فهي قصيرة  و لكن عريضة زي او . بي . آي لكن باقي الاسماء كانت فرشتهم نحيفة

طبعا هو اظبط لو تحطي طبقتين من اللون..بس حسيت طبقة وحدة تنفع لانه اللون تقيل..بس في الصورة انا حاطة طبقتين بالاضافة الي طبقة شفافة قبل و بعد اللون

اسمه L22 Curacoa تلاقوه مكتوب ورا القارورة

هذا رأيي و تجربتي مع هذا اللون و الماركة

انتظروا المزيد ان شا الله

للمعلومية

فروع سيفورا في جدة

رد سي مول

التحلية سنتر